Rama: Për vetëm 10 ditë, 130 mijë qytetarë nga vende të ndryshme vizituan Prishtinën
Kryetari i Prishtinës, Përparim Rama ka bërë të ditur se në 10 ditët e fundit të dhjetorit 2023, mbi 130 mijë qytetarë u bënë pjesë e festave në Prishtinë.
I pari i kryeqytetit shtoi se edhe një herë u tregua përmes këtyre festave se sa vibrant, i veçantë dhe i ngrohtë është Prishtina.
“Mbi 130 mijë qytetarë, shumë prej tyre vizitorë nga vende të ndryshme, për vetëm 10 ditët e fundit të dhjetorit 2023, u bënë pjesë e festave në Prishtinë”.
I pari i kryeqytetit thotë se kjo pjesëmarrje tregon se Prishtina është e veçantë.
“Sheshet tona, rrugët e lagjet e ndryshme janë mbushur me qytetarë si kurrë më parë. Bisedat me njëri – tjetrin të shoqëruara me kafen, çajin apo verën e ngrohtë nën tingujt e magjishëm të këngëve tona të interpretuara mrekullisht nga artistët tanë, na treguan edhe njëherë se sa i veçantë, vibrant e i ngrohtë është kryeqyteti ynë”.
“Në Prishtinë, këtë vit në hapësirat publike, hapësirat e qytetarëve, do të vazhdojmë me intervenimin në shtimin e gjelbërimit, krijimin e këndeve për fëmijë, shtimin e ndriçimit publik dhe rregullimin e disa prej tyre me kalldrëm”.
“Do të organizojmë super festivale, koncerte, lojëra e shumëçka tjetër, për të sjellë momente të veçanta për të gjithë ne, sepse kemi projekte me të cilat do t’ua kthejmë hapësirat publike qytetarëve”, ka shtuar tutje Rama duke thënë se “Prishtina u takon qytetarëve”.
