​Kurti: Plani i rritjes duhet të përshpejtojë anëtarësimin e BP në BE

Kryeministri i Kosovës, Albin Kurti, ka thënë se Plani i Rritjes dhe Tregu i Përbashkët Rajonal i Procesit të Berlinit duhet të përshpejtojnë anëtarësimin e Ballkanit Perëndimor në Bashkimin Evropian.

Kështu ka thënë Kurti gjatë darkës së mbrëmshme me liderët rajonalë të shtruar nga kryeministri i Maqedonisë së Veriut, Dimitar Kovaçevski.

Në komunikatën për media thuhet se kreu i ekzekutivit ka theksuar po ashtu se fondet e BE-së duhet të jenë të ndërlidhura me vlerat e BE-së.

Kjo darkë i paraprin takimit të liderëve të Ballkanit Perëndimor së bashku me përfaqësues të Bashkimit Evropian dhe Shteteve të Bashkuara të Amerikës që mbahet sot në Shkup kushtuar Planit të Rritjes për Ballkanin Perëndimor, të miratuar nga Komisioni Evropian.