Qeveria e Kosovës ka miratuar Projektligjin për ratifikimin e marrëveshjes financiare për IPA 2020 ndërmjet Kosovës dhe BE-së.
Me këtë rast Kosova përfiton mbi 90.2 milionë euro.
Zëvendëskryeministri Driton Selmanaj ka thënë se me miratimin e këtij projektligji mund të mundësohen investime të konsiderueshme në arsim, energji e sektorë të tjerë.
Sot në mbledhje, Qeveria e Kosovës ka miratuar edhe projektbuxhetin për vitin 2021. Projektbuxhetin e ka prezantuar Ministrja e Financave, Hykmete Bajrami, ku ka thënë se buxheti për vitin e ardhshëm do të jetë 2.4 miliardë euro. Sipas saj rritja ekonomike për vitin e ardhshëm do të jetë 5.2%. Ministrja e Financave, Hykmete Bajrami sot në mbledhjen e Qeverisë ka paralajmëruar se ekonomia mund të tkurret për 6.7%, shkaku i pandemisë Covid-19. Në projeksionet e buxhetit për vitin e ardhshëm u përfshinë edhe disa projekte nga ministri i Ekonomisë, Blerim Kuqi. Ndërkaq, me kërkesë të ministrit të Infrastrukturës, Arban Abrashi në këtë buxhet u përfshi edhe ndërtimi i autostradës së Dukagjinit. Për dy këto kërkesa abstenoi ministrja e Financave, Hykmete Bajrami./21Media
