Në rendin e ditës, zgjedhja e kryetarit dhe nënkrytarëve të Kuvendit
Filloi seanca konstituive e Kuvendit të Kosovës. Seancën po e udhëheq deputeti më i vjetër i Kuvendit, Jahja Kokaj, i shoqëruar nga deputetja më e re, deputetja Fjolla Ujkani.
Kokaj e filloi seancën duke falënderuar përfaqësuesit e institucioneve të ndryshme.
Interesim të madh për seancën konstituive të legjislaturës së shtatë ka edhe nga ambasadat e huaja të akredituara në Kosovë, përfshirë ambasadorin e SHBA-ve, Britanisë dhe shumë përfaqësues tjerë diplomatik.
Pikë e parë e seancës do të jetë formimi i komisionit të përkohshëm për verifikimin e kuorumit dhe të mandateve, për t’u pasuar me betimin e deputetëve. Seanca konstituive do të përmbyllet me zgjedhjen e kryetarit dhe të nënkryetarëve të Kuvendit.
Po ashtu janë përcaktuar edhe ulëset për grupet parlamentare. Kështu, konform rregullores dhe praktikës së deritashme, grupi më i madh parlamentar që është Vetëvendosje do të ulet në qendër, grupi i dytë me radhë e që është LDK në anën e djathtë të kryesuesit të seancës, ndërsa grupi i tretë që është PDK në anën e majtë të kryesuesit. Përcaktimi i ulëseve për grupet e tjera do të bëhet në vijim./21Media
