Fëmijët u ribashkuan me familjen pasi mbijetuan 40 ditë në xhungël

Katër fëmijë që mbijetuan disa javë vetëm në xhunglën e Amazonës së Kolumbisë, janë ribashkuar me të afërmit e tyre teksa po shërohen në spital.

Vëllezërit e motrat, 13, 9, 5 dhe 1 vjeç, janë “shumë të dobët”, por “të lumtur që shohin familjen e tyre”, tha gjyshi i tyre, Fidencio Valencia.

Ata po flasin pak dhe dy prej tyre kanë filluar të luajnë, thonë zyrtarët.

Katër fëmijët u gjetën të premten pas më shumë se një muaji kërkim nga ushtria dhe njerëzit vendas.

Ata u zhdukën pasi avioni në të cilin ndodheshin u rrëzua më 1 maj. Nëna e tyre dhe dy pilotët humbën jetën në aksident.

Ekipet e shpëtimit i gjurmuan pasi zbuluan shenja në xhungël, duke përfshirë gjurmët e këmbëve dhe frutat që ishin kafshuar.

Dy nga fëmijët, foshnja një vjeç dhe pesë vjeç, i kaluan ditëlindjet e tyre në xhungël, ndërsa Lesly më e madhe, 13 vjeç, i udhëhoqi ata.

Ata mbijetuan duke ngrënë miell që gjetën në rrënojat e avionit dhe më pas farat, tha Valencia.

Ministri i Mbrojtjes i Kolumbisë, Ivan Velasquez, i cili i vizitoi ata në spital me Presidentin Gustavo Petro të shtunën, lavdëroi Lesly për kujdesin për vëllezërit e motrat e saj më të vegjël.

“Është falë saj, vlerës së saj dhe udhëheqjes së saj, që tre të tjerët ishin në gjendje të mbijetonin, me kujdesin e saj, njohuritë e saj për xhunglën”, tha Velasquez.

“Në përgjithësi fëmijët, djali dhe vajzat janë në gjendje të pranueshme, sipas raporteve mjekësore janë jashtë rrezikut për jetën”.

Mjeku ushtarak Carlos Rincon tha se ata kishin “mangësi ushqyese”, por kishin mbijetuar vetëm me “disa lëndime të indeve të buta, kafshime dhe lezione të lëkurës”.

Ata nuk janë ende në gjendje të hanë, tha ai, duke shtuar: “Ne do të fillojmë procesin e inkorporimit të ushqimit kur të përfundojmë procesin e ekzaminimeve klinike që do të bëhen sot. Nëse gjërat shkojnë mirë, besojmë se do të qëndrojnë në spital për dy deri në tre javë”.

Astrid Caceres, drejtoresha e përgjithshme e Institutit Kolumbian të Mirëqenies Familjare, tha se fëmijët “nuk flasin aq sa do të donim ne” dhe u duhet kohë për t’u rikuperuar./21Media