AGK: Deklaratat e Kurtit përpjekje serioze dhe e papranueshme për ndikim qeveritar në punën e mediave
Asociacioni i Gazetarëve të Kosovës, i ka cilësuar ‘‘për keqardhje’’ deklaratat e kryeministrit në detyrë, Albin Kurtit, lidhur me raportin e Reporterëve pa Kufij, duke thënë se Kurti s’i ka adresuar gjetjet e raportit, po i ka fajësuar mediat dhe gazetarët për renditjen në vendin e 99.
AGK në reagimin e saj ka thënë se deklarimi i Kurti ku ai ka ofruar “trajnime dhe kurse nga Qeveria për gazetarë dhe media”, është një përpjekje serioze e e papranueshme për ndikim qeveritar në punën e tyre, dhe tendencë për të vënë në pikëpyetje profesionalizimin e mediave kosovare.
”Kryeministri në detyrë Kurti nuk ka përmendur miratimin e ligjit anti-kushtetues për Komisionin e Pavarur të Medieve, ndikimin politik të partisë së tij në Transmetuesin Publik, RTK dhe as fushatën e vazhdueshme të përdorimit të gjuhës nxitëse dhe të urrejtjes ndaj gazetarëve dhe mediave, nga zyrtarë të partisë së tij”, thuhet tutje në reagim.
